5 Dekabr - Beynəlxalq Könüllülər Günü ilə bağlı hazırlanmış “Könüllülər həftəsi” proqramı çərçivəsində gənclərin könüllü fəaliyyəti və könüllülük sahəsi ilə bağlı müzakirə təşkil olunub. Tədbirdə Naxçıvan Muxtar Respublikası Gənclər və İdman Nazirliyinin gənclərlə iş üzrə məsul əməkdaşları və qurumun ətrafında birləşən könüllü qrupunun üzvləri iştirak ediblər.

Nazirliyin əməkdaşları könüllülərə il ərzindəki aktiv fəaliyyətlərinə görə təşəkkür edib, Gənclər və İdman Nazirliyinin könüllülərlə bağlı həyata keçirdiyi işlərdən, gələcək planlardan söz açıblar. Qeyd olunub ki, könüllülük sahəsinə ölkəmizdə, eləcə də onun ayrılmaz hissəsi olan muxtar respublikada xüsusi önəm verilir, könüllülərin şəxsi inkişafı, karyera imkanlarının yaradılması istiqamətində dəstək göstərilir, onların yaxından iştirakı ilə müxtəlif tədbirlər, sosial layihələr icra olunur.

Diskussiya formatında keçən tədbirdə gənclər könüllü kimi cari ilin onlar üçün necə keçdiyi, fəaliyyətlərinə hansı yenilikləri gətirmək istədiklərini və gözləntilərinin nələrdən ibarət olduğunu ifadə ediblər. İştirakçılar növbəti ildə öz təkliflərini bir neçə layihə halında nazirliyə təqdim edəcəklərini bildiriblər. Əsasən, düşərgələrin, əyləncəli oyunların və sosial xarakterli layihələrin davam etdirilməsinin arzuolunan olduğunu diqqətə çatdırıblar.